To se jim zamówiało



Pobieranie 0.96 Mb.
Strona19/43
Data28.04.2016
Rozmiar0.96 Mb.
1   ...   15   16   17   18   19   20   21   22   ...   43

JEZUS

W pióntek u nas zaczinały świynta. Tu w Rzecku wszak miała być Paska (Wielkanoc) aż za tydziyń. Na polskim słupie my wyczitali, że mo dzisio być na taki a taki adresie film Jezus. Mało gdo z nas to widzioł, tak my se rozhodli, że to to pujdymy zhlednyć. Było to w takim małym kościółku, kiery był w jednym baraku u bazaru aż na szóstym piyntrze. Normalnie dwiyrze jak do kwartyru a tam taki moderni kościół. Młodo sympatycko Angliczanka nas pieknie uwitała a pytała se, czi niechcymy kupić jaki ksiónżki. Było tam tego pożegnanie. Ale my zaś byli wycucani z pyniyz, bo były wszecki w biuru. Także my skónczili na zdworzilostnich otazkach typu zkiyl my sóm a podobnie. A na trapasu, że my se nimógli domówić wiyncej.

Usiedli my do stołków a czakali, co se też beje dzioć. Prziszeł jakisi trzicatnik, snad ksióndz. Powiedzioł, że to je anglicki kościół a że ón tu mo teraz takóm mise. Nejpiyrw zhlednymy film a potym bedymy dyskutować. Byko to piekne. Człowiek tymu rozumioł aj choć to było w anglicztinie. Miejscami żech aj zaczinoł wierzić w Boga. Ja - malem bych zapómnioł, co tam była kromie nas za partyja. Polocy, Bulharzi, Etiopie. A prawie z tej Etiopie, tako mało sympatycko czernoszka zaśpiywała nadherny gospel a cwakała se do rytmu na palcach. My ji pómogali z refrenym a nejwiyncej było słyszeć Alleluja, jak w tej grotesce z Mr.Beanym na Sylwestra w telewizi. Diskuse skóncziła asi na tym, że misionarz widzioł, że z nami moc niepomówi, tak my Aspóń wypisali taki statisticki listki, czi wierzimy, czi ni a czymu my prziszli na tyn film. Jo tam zaszkrtnył odpowiedź, że w Boga niewierzim a na film żech prziszeł tymu, bo bych se chcioł o nim czim jak nejwiyncej dowiedzieć.

O 21.00 żech mioł domówióny telefón. Trzeba lecieć!. Hónym! Było 20.00. Janek wołoł o 19.00 a mioł mie czakać w suflaczarni. Tam, kaj my byli hned piyrwszi roz z Dymym, Renatóm a a Karłym. Chwałabogu! Był tam. Aj z Villym a Martinym. Dali my eszcze po piwu a na metro. Viktoria a ku ústředně. Ludzi uż tam moc niebyło. Zebroł to Janków tata a przedoł mi mojigo tate.

Czau!

Słyszoł jo jich, jak gdyby wołali z wedlejszi budki. Mówił jo aj z mamóm aj z Basióm. Sprawa, że przijadym aż kajsi na Wilie, ich kapke zaraziła. Tata sice był tymi łódkami nadszóny. Eszcze jak żech mu powiedzioł, że do Australie, nebo do Ameryki. Ale mama z Basióm nic moc. Ale pożegnali mi. Abnormalnie mie to psychicki podporziło. Był żech ganc wyrownany a na pore dni żech mioł pocit, że żech je praktycki od chaupy yny kónsek.


DYMO NA NAWSZCZEWIE

W niedziele prziszeł do nas Dymo z Renatóm. Jak słyszoł do czego my inwestowali po

48000 Dr., tak se chytoł za głowe, że my uż na nic rozumniejszigo nimógli nalecieć. My mu prawili, że kłóci cypowiny, ale ón na to:

- Uvidíte! Já uż jsem taky oslavoval, że pojedu do Kanady a jsem tady.

Zacznył nóm opowiadać swoje story, jak inwestowoł 200000 Dr. do biura, kiere mu miało zarzóndzić trwały pobyt w Kanadzie. Miesiónc, dwa, pół roku a fórt yny odwlykani. Potym zacznył zjiszczować, czi se uż gdo przez to biuro za ocean wubec dostoł a zjiścił, że żodyn.

Roz na tóm zprostrzedkowatelke wyczihnył a jak szła, tak nastartowoł motorke a wjechoł na chodnik. Sturził jóm na ziym. Chycił jóm za włosy a wycióngnył po schodach do tego biura. Tam zacznył wszecko rozbijać a wrzeszczoł, aż mu do prachi. Fórt niechciała, tak jóm zacznył dusić a jak powolił, tak hned otwiyrała szuplik a dała mu eszcze wiyncej, niż mioł dostać.

Ja, to był eszcze Dymo feszak, jak był u nas. Modry ancug, bioło koszula, czorno krawata, opolóny do hněda, bioły uměly chrup. Cosi my se tam bawili o nevěře. A Renata mówiła:

- Tylko raz by mi to Dominik spróbował zrobić, to on dobrze wie, co bym mu ja zrobiła.

- A co takigo?

- No co! Przyszedłabym tutaj i powiedziała: Tak co chłopaki, Kto ze mną idzie pierwszy?!

A my wszecy buch do śmiychu.

- A co wy myślicie?! Żebym tego nie była zdolna?

Każdy se w duchu pomyśloł - snad ja, ale żodyn by z tebóm nieszeł – Ty pi...!

FILIP, MARTIN

Bliżiła se Paska. Irakli roz do roboty prziszeł, podrugi ni. Przed Kalo Paskóm chodził ale cały tydziyń. Bodej by ni, jak we sztwortek se kóńcziło a rozdowało se wypłaty a dobrzi makaczi, albo ci, co tam robili dłógo dostowali dorro (premie 30 aż 40000 Dr.) Irakli se cały tydziyń snażił o żiwot. Jak była we sztwortek wypłata, tak dorro niedostoł. Jo samozrzejmie też ni, bo żech tam robił krótko. Niko nóm kupił po sendwiczu a piwu a pozwoł nas ku sebie do kanclu. Irakli spuścił.

- Ola kosmos echo dorro, mono ego denecho (wszecy ludzie dostanóm dorro, yny jo ni).

Pry to je strasznie niesprawiedliwe. Niko mu ale niemówił, że ni. Doł nóm úkol. Jeśli przez świynta ukludzimy piyrwszi, drugi a trzeci piyntro, tak dostanymy 50000 Dr. Na piyrwszi piyntro nóm dowo jedyn dziyń, nadrugi dwa dni a na trzeci jedyn dziyń. Mómy na to pióntek, sobote, niedziele, pyndziałek a wtorek. Zebrali my to. Z Iraklim jo se domówił, że se tego jutro porzóndnie chycimy a zkusimy to zmaknyć za czim jak nejkrótszóm dobe.

Stawił jo se na Omunii, bo żech chcioł iść na nakupy. Szeł żech se podziwać ku polskimu słupu. Widzioł żech tam czeski letak. Jindro, jsme tady u prvního kulatého stolu. Filip a Martin.

No ja, dyć Jindra cosi spóminoł, że tu możne przijadóm dwo syncy z Trzyńca. Yny że u tego konkretnigo stołu było strasznie moc ludzi. Tak żech ich obeszeł a wytypowoł żech dwóch synków, kierzi wyglóndali na Czechów a pisali pohledy. Háček, délka. Spytoł żech se jich:

- Where do you come from?

- Czechoslovakia!

Tak żech ich zebroł ze sebóm na nakupy a potym pozwoł aj na piwo do naszi piyrwszi suflaczarnie pod Omunióm na pieszi zonie. Jako mazak żech jim opowiadoł, jak to tu wszecko chodzi a podobnie. Dali my po dwa kónski a jechali na Attiki. Myśloł jo se, że Jindra beje przekwapióny, ale ón jaksi niedowoł najewo żodnóm radość. Ani żodyn z dalszich spolubydlicich. Dyć zaś nas zaczło być dziewiynć. Spisz to zaś beje pakarna. Kareł prawił, że ich beje trzeba dać Dymowi na ostrow. Także jakisi rzeszeni tu było.

1   ...   15   16   17   18   19   20   21   22   ...   43


©absta.pl 2016
wyślij wiadomość

    Strona główna