To se jim zamówiało



Pobieranie 0.96 Mb.
Strona24/43
Data28.04.2016
Rozmiar0.96 Mb.
1   ...   20   21   22   23   24   25   26   27   ...   43

DAREK

A co rano, to stresy. Yny uż miynszi. Bywało nas uż yny piynć. Jo, Kareł, Jindra, Janek a Raf. Mariusz a Halina se odkludzili na podnájem ku jakimusi inženýrovi, kiery mioł nimocnóm mame. A tak se Halina o nióm starała. Martin robił na ostrowie a Filip jechoł po ty padaki do republiki a jak se wrócił zpatki, tak też uż zaparkowoł na Eretrii. Metro aż na Pireus. Naucził jo se tamstyl jeździć autobusym. A co nowego w robocie?

Zaś jo se kapke odpocznył od Janysowych ukolów, bo se porzóndził na miejsce Karła nowego denekarza Darka. Także mojóm powinnościóm było wdycki rano zasobić go wodóm. To też była pakarna. Szlauch był krótki. Dostoł z parcziku yny na drugi piyntro a óni byli na sztwortym. Nikiedy my aj wode wycióngali na porwozu ganc z přízemí. Janys był taki hajzel, że niechcioł pojczać kary ani wratek. Choć by to było chytrzejszi a rychlejszi. Konecznie roz przismycził szlauch tak dłógi, że jak my go spojili z tym na drugi piyntro, tak my wygnali wode aż na sztworte. Jak wrzeszczeli, że dobre, tak jo go wymóntowoł w parcziku ze zdroja a szeł żech se za swojóm robotóm.

Ci cypi zaś samozrzejmie tyn drugi kóniec niewycióngli z beczki a woda wyciykła nadół zpatki. Za pore minut po mie wrzeszczeli, czymu żech nienapuścił tóm drugóm beczke. Szkoda wyświetlować.

Darek był perfektni synek. Taki skrómny. Wyglóndoł jak gdyby se niechowoł srać na głowe, ale mioł za uszami. Był w Rzecku uż dwa roki a inwestowoł ze siostróm uż 1600 USD, aby se dostoł do Kanady. Eszcze niebył ani na interviu a uż po nim chcieli, aby zapłacili dalszi dwa razy po 800 USD. No prachi obrowski. Opowiadoł żech mu o naszi inwestycyji do morza a ón se prziznoł, że:

- Też jestem marynarzem.

Pry se tym w oboru wyucził w polskim Gdańsku. Nimioł ale wubec żodnej szance załapać se na statek a w dodatku mioł iść do wojska. Tak raczi zderził tu.


AMERYKA

Do biura my chodzili prawidelnie. Awszak marynarski ksiónżki fórt niebyły. Roz nóm ale Kazek powiedzioł, że mo dla nas sztyróch Czechów kontrakt do Ameryki. Aby my mu w pióntek prziniyśli dalszich 30000 Dr. Dwacatego maja jeśli nic niewlezie do cesty mimorzadnego, tak wypływómy z Pireusu. Mieli my cały tydziyń na rozmyślyni. Dość my o tym pochybowali, ale jak to owierzić? Jo w pióntek rano powiedzioł, że to ryskujym. Syncy se rozhodli też pro a tak my uż o 17.00 byli przed biurym. Eszcze było zamknióne. Zachwile se objewił Kazek z jakómsi mrchóm. Prawił, aż na niego eszcze chwile poczkómy a szeł se z nióm cosi domówić do nejbliższi kawarniczki. Potym z nami wyjechoł nawyrch wytahym a zacióngnył nas do kancnaryje. Ukozoł nóm, jak asi wypado kontrakt, kiery przidymy w pyndziałek podpisać a wybroł od nas po 30000 Dr. Wystawił nóm piekne ucztenki a powiedzioł nóm, że se nimómy czego boć. Najisto bedymy społu na jednym statku. Niepodobało se nóm to ani za mak. Eszcze jak Jindra powiedzioł, że tam na tym papiyru, co nóm ukazowoł, było Chicago a to je przeca we vnitrozemí. Dziwali my se na mape a jo tak z tego wysóndził, że by tam tymi jeziorami a tóm wielkóm rzekóm szło dojechać. Ale gdosi zaś twierdził, że to co nóm ukazowoł, to był przeca taki yny wzor. Ale co?! Nakóniec uwidzimy w pyndziałek.



WOJTKOWE IMIENINY

Byli my ma nich pozwani w sobote. Zrobili my docela solidni prezent. W Pewexu, coż je skládka wychyniónego nábytku a podobne wiecy, my naszli takóm figurine na chromowanej tyczi. Teda było to yny od pasu nawyrch. Cosi jako pomucka dlo krawców na wypasowani saka a podobnie. Do tego my nakupili dwacet piw. Przitłókli my na to czeskóm wlajke. Z papiyru my zrobili głowe a na nióm dali mój kłobuk. Zadzwónili my a powiedzieli:

- Tu mosz Poloku w Rzecku od Ślónzoków czeskigo chłopa z holandskimi bachorami.

A chytli my sie chlastu. Chlebiczki, gorzołka, no wszecko. Zmóntowali my se jak se patrzi. Trzeba Jindra usnył na stołku a naroz gich – tako szawla! Rano, jak my mu to opowiadali, tak yny powiedzioł:

- To wiysz że ja! To wóm tak zeżerym.

Szpica była Agnieszka:

- Tomek, wiesz jak cię kocham? Ty jesteś taki fajny chłopak. Ty umiesz grać na skrzypce, ja też. Twój ojciec mieszkał w Australii, moja mama też. Jak ja cię kocham!

- Ty Agnieszko posłóchej! Jo cie kochóm też, ale Piotrek, który siedzi obok ciebie a śpi, tak ón cie kocho jeszcze wiyncej. Ón cie tak kocho, że cie normalnie maluje po ścianach w naszim mieszkaniu. Taki kosteczki w postrzodku z kryskóm.

- Co ty gadasz?! Jak ja cię nienawidzę!

Skocziła ku mie a zaczła mie niby bić. Potym se ku mie przituliła a usnyła mi z głowóm w klinie. Samozřejmie że se zaś rozcharczała jak traktor. No moja zwiedawo rynka zaczła kopirować jeji dosud nieznóme území. Jak żech był na piersiach, tak se mie Janek spytoł:

- Jaki mo cycek?! Dobry?

- To wiysz że ja! Pój zkusić!

Jankowi se nieciónżało dźwignyć se z fotela, poprzekraczować ty nawalóne baraby a wyzkuszać to też.

- Fakt dobry! Taki twardy!

Jedyny, kiery eszcze niespoł, tak to był Kareł. Janek wszak odeszeł do chaupy, bo tam uż zdechnył pies. Tak my zaczli z Karłym debatować o Ewie. W tej naladzie mi to niedało a prawim mu:

- Kareł wiysz jak żeś mi łoto w tej suflaczarni opowiadoł, że żeś se je jisty, że jak żeś se wtedy wrócił z Rzecka, tak Ewa musiała parzić z tym Juróm. Jo se musioł w duchu tymu śmioć a nimioł żech se ci prziznać. Ale dzisio ci to powiym. Bo chcym być vůči tebie uprzimny. Óna nieparziła z Juróm, ale zy mnóm.

Kareł se nad tym chwile zamyśloł. Skoro to z nim ani niecukło, bo ón je przeca wyrownany jak Indian u muczednickigo kůlu a powiedzioł mi:

- Wiysz co Tome? Jo se stejnie myślim, że wy dwo byście se eszcze mieli dać do kupy.

Kecali my tak asi kajsi do 9.00 rana. Polocy uż stowali z łóżek, jak my se odebrali do pelechu.


POPROWKI

Tak żech se obudził aż kajsi o 18.00. Kareł był w terenu zarobiać sóm. Mie pry nieszło spamiyntać. Nagarbił aż 8000 Dr. Jindre jo popytoł, czi by nieskocził po piwo. Hned my trzasli po jednym a chycił jo se gotowanio wieczerze. Jaksi żech był przespany, tak żech se rozhodnył, że zóndym do dziadka, kupim ze szejść piw a skoczim eszcze do Romków. Żodyn se wszak niechcioł zy mnóm ku tej akcji hecnyć, tak żech to musioł zrobić sóm. Óni se dziwali na telewize a prziwitali mie celkem mile. Popijali my aż kajsi do 1.00 a dobrze my se wykecali. Teda asi głównie jo. Do chaupy se mi uż niechciało, tak żech jich popytoł, czi bych u nich nimóg przespać. Pry bez problemu. Rano mie budzili do roboty. Wszimnył jo se, że stowajóm wszecy, kromie Bożenki od Romka, z kieróm żech se nejwiyncej z tej partyje rozumioł. Tak żech zagłosił:

- Pierdolę, nie idę do pracy! Przecież mam maturę!

Obrócił żech se a z urczitymi umyslami żech społ dali. Za godzine słyszim rachocić klucz w zómku. Wrócił se Romek. Asi mu kupa wiecy doszło przi czakaniu w metru. Tak se to rozmyśloł a prawi: - Też pierdolę, też mam maturę!!!

Na drugi dziyń go uż do roboty niezebrali.

1   ...   20   21   22   23   24   25   26   27   ...   43


©absta.pl 2016
wyślij wiadomość

    Strona główna