To se jim zamówiało



Pobieranie 0.96 Mb.
Strona13/43
Data28.04.2016
Rozmiar0.96 Mb.
1   ...   9   10   11   12   13   14   15   16   ...   43

MONASTIRAKI

Rano kapanek kocowina. Hodnocyni wczorajszka niebyło to nejgorszi, ale mómy kapke inszi styl zabawy niż Polocy. Każdopadnie ni tak chaotycki. Zadziubali my do Rafa:

- Co to było wczora z tóm Agnieszkóm?

- Tome, já ti řeknu jedno, Agnieszka je holka, která by stála za to.

No było widzieć, że je do ni praskły. Dobrze se aj u piwa na spamiyntani posłóchało Mariuszowe narzki:

- Tak mie nałapać, jaki wstyd! Takie wspaniałe towarzystwo, takie piękne mieszkanie! A ja tam takie obrzydliwości śpiewałem.! To ty Tomasz za wszystko możesz.

Po obiedzie my se z Karłym a Rafym wybrali na Monastiraki. Pry tam je bazar a strasznie moc ludzi. Była niedziela. Wylyźli my z metra a hned nas zaujnył hlouček ludzi kolem jakigosi waryjota. Był to lamželezo we wzpieraczkim albo zapaśnickim dresu scióngnióny opaskym. Co konkretnie robił, to żech niewidzioł, ale od krwie był zbabrany po całym pysku. Pry wychybowoł jakisi żelazne kuloki do luftu a chytoł ich na głowe a podobnie. No pieknie dzynkujym za taki druh obżiwy. Ale aby my se tam dzisio użiwili z Karłym muzykóm, na to my też moc prostoru nimieli. Abnormalnie ciasno miyndzy tymi kramkami ze wszelijakimi cetkami, hadrami, magiczami, suflakami, porno kazetami. No prostě zaś všehochuť. Obrazy, tepichi, deski, instrumenty, sportowni potrzeby, szkło, porcelan, gwery apod. Byli my radzi, jak my se wymotali z tego dawu a dostali se do metra. Ja yny że problem. Metro odstawióne. Pry był kajsi jakisi fuzbal, czi co a fanouszcy robili wielki randal. Także pieszóm zonóm a na Attiki. Akurat tak my uciykli deszczu.


NIKOLAS

Zaczło morowo loć. Dorazili my na kwartyr a czumieli na telewizor. Padało całóm noc. Rano se połówka partyje wróciła skyrz deszcza zpatki z roboty. Aj Kareł. Pyniyze pómału dochodzały, tak żech go przemówił, aż idymy grać na Omunie. Wyzkuszali my to zaś w podchodu smierem ku brylóm. Mieli my zarobióne asi 4000 Dr. Prziszeł ku nóm jakisi cywil a prawił nóm, że se tu nieśmiy grać, inaczi zawoło policajtów. Tak nóm niezbywało nic inszigo, niż se pómału balić futrale. Gdosi nas oslowił po anglicku. Kudrnaty Rzek asi trzicet piynć roków. Pry dobrze grajymy, że nas uż posłóchoł, także nas zakludzi na dobre miejsce, zkiyl nas żodyn niewychynie. Szli my za nim. Deszcz zrowna niebył żodyn. Zakludził nas na pieszóm zone, kieróm jo uż znoł od wczora. Mówił, że łóni tu grali jacysi ostrowani a futraly mieli durch przepełnióne. Yny że to była turystycko sezóna w pełnym próndu. Teraz tu wszak moc ludzi niebyło. Kareł mi cosi spómnioł o tym, że Jura se tu uż pokuszoł grać przed rokym, jaksi se mu niedarziło, tak to zbalił a uż to nieprubowoł nigdzi indzi. Rzek se nazywoł Nikolas a pozwoł nas na kawe pod parazole. Bulczeli my o polityce. Nimioł rod Ameryczanów. Jako ostatnie też aj wiynkszina Rzeków. Pry tu przismyczili moc zapadni kultury a zaś ty rzeczi o kapitalismu. Niewiym co z tym fórt majóm. Pytoł se jak robimy. Wyćmawili my mu situace. Ón mioł brache, kiery mo fabryke na mramor a że by mie teda móg zamiestnać. Yny że problem. Było to daleko do Athen. Na dojyżdżaniu bych ztracił asi sztyry godziny dziynnie. Także to Kareł za mie welkoryse odnmitnył. Podarziło se nóm aj kromie tej kawy od niego wysomrować kupa cygaretli a zbytek krabiczki nóm przeniechoł. Čau, teda jasu megale (ahoj velké). A do metra. Eszcze cosi przirobić a do chaupy. Pokec z partyjóm. Na piwo do suflaczarni. Telewiza. Spaneczek. Budiczki. Uklid. Huśle, Anglicztina, Rzecztina, obiod.



ZA ROBOTÓM

W tyn dziyń prziszeł wczasi z roboty Raf a przikludził ze sebóm kolege, kiery se nazywoł Kazek. Samozrzejmie że z Kazkym była aj siódmiczka gorzołki. Ku tymu flaszka CocaColy. A piło se.

Kulise ku chlastu nóm robiła muzyka z moji kazety Blaf. Kupodziwu Kazek wszeckimu rozumioł. Był to Ślónzok zkiylsi z Bielska. Dobry synek. Mówił skoro po naszimu a Czantoryje, Stożek, Bagiyniec a tamty nasze stróny mioł przeszłapane jako pohraniczarz. Teda wojok zakladni słóżby. We trójke my zdołali eszcze jednóm sedme. A okno. Zbudził jo se, jak uż była ćma a wszecy byli dóma. Głowa bolała jak cyp a Kareł yny:

- Pój grać!!

Niebył żech prowozuschopny. Także przewlyc se do piżama a dobranoc.

Rano o 5.00 przijechoł Dymo, że jadymy zganiać robote. Konecznie!! Doufejmy, że to wyndzie. Objeździli my kafenia na Kipupoli. Nic!

Tak my zaczli jeździć po stawbach. Chodzili my za mastorami. Jedno ochi za drugim. Kaj sie robiło, wszyndzi mieli dość ludzi. Przejechali my okrajym Athen aż za Pireus. Siła!! Widzioł jo piyrwszi roz tyn wielki przistaw. Lodě!

Tam se tak dostać! Wiym, że cosi Mariusz tocził o tym, że czitoł w polskim plátku Echa Ojczyzny, że robióm nábor na liberyjski łódki. Jeździli my dali po stawbach, ślosorskich warsztatach. Nigdzi nic. Całe dopołedni my strowili na pincku a wysledek żodyn. Głód. Do chaupy na obiod.

- Czau! A jutro zaś!

Pry można eszcze cosi zarzóndzi wieczór po telefónu.

Moc jo uż tymu sice niewierził, ale situace niebyła zoufalo. Grani wynoszało tak, żech uż mioł spłacónych 7000 Dr. dłógu a aj spłacónych 6000 Dr. za kwartyr. A szpajske żech też eszcze jakómsi mioł. Aspóń na dwa dni. A to my z Karłym eszcze w tyn dziyń wyrazili kole pół siódmej z nastrojami na Omunie a zarobili tak, że my se zaszli na piwo a na suflaki. Yny że ta gospoda, jak my byli hned po przijezdu do Athen, niebyła dobro, bo tam w tej knajpie, jak były ty suflaki, tak mieli czepowanego Hainekena za 250 Dr. W tej wedlejszi zaś był Amstel, ale nimieli tam suflaki. Tak my kónsek niżi naszli takóm sprawnóm, kaj mieli oboji naroz a w niż se schodzało taki solidni podsvětí. Dwo najisto bracio. Jedyn z nich uż społ na stole. Potym szkaredo pulyrzica bez zymbów, kiero isto kiejsi była koczka. Hrací skříň. Buzuki. Pulyrzica tańcowała. Ożralcy se wadzili, aż se skoro pobili a my z Karłym kónzumowali suflaki a piwszcziska. Na zachod se chodziło do piwnice po toczitych schodach. Dobro akustyka. Było tam z tego hajzla ganc konkretnie słyszeć o czim se bawióm u jednego stołu. Akurat że to było w rzecztinie.




1   ...   9   10   11   12   13   14   15   16   ...   43


©absta.pl 2019
wyślij wiadomość

    Strona główna